Bhojpuri के धइले बा रीमेक के रोग, अक्षरा, खेसारी, रितेश बनावsता लोग खूब

गीत के सुने के माध्यम जइसे बदलल ओकर संगीत, धुन, लय में परिवर्तन भइल. गीतन के माने बदलल, ओह में प्रयोग होखे वाला शब्द बदलल. फेर एगो अइसन समय आइल जब चारु ओर इलेक्ट्रॉनिक म्यूजिक के दौर छा गइल, पुरान, नया सब गाना रीमिक्स होखे लगली सन.

  • Share this:

जइसे बधार में कोरोना घुसल बा, ओइसहीं गीत-संगीत के संसार में रीमेक घुसल बा. सगरो रीमेक के बयार बह रहल बा. रीमेक सदाबहार गीतन के संक्रमित कर रहल बा, ओकरा आत्मा के मार रहल बा. कोरोना से रीमेक के तुलना एही से कइनी हं, काहें कि दुनू के फइलाव बड़ा तेजी से होता. देखा-देखवास लागल, फलाना के कादो लागल वाला खीसा चालू बा. एक जना करsतारे त दुसरो के कीड़ा काट लेता. धीरे-धीरे रीमेक गीतन के बाढ़ आ गइल बा आ अब भोजपुरियो एह से अछूता नइखे. अइसहूँ भोजपुरी में नकलची गीतकार-संगीतकार ढेर बाड़न.

गीत-संगीत के रूप, गुणवत्ता, इंस्ट्रूमेंट, आवाज में समय-समय पर बदलाव होत रहेला. कबो लोग लाइव गीत-संगीत के मजा लेव. फेर रिकार्ड के जमाना आइल, तवा पर गाना रिकार्ड होखे लागल, ग्रामोफोन में बाजे लागल, ओकरा बाद कैसेट के युग आइल, फेर सीडी के, फेर मेमोरी कार्ड के आ अब इंटरनेट स्ट्रीमिंग के दौर चल रहल बा. गीत के सुने के माध्यम जइसे बदलल ओकर संगीत, धुन, लय में परिवर्तन भइल. गीतन के माने बदलल, ओह में प्रयोग होखे वाला शब्द बदलल. फेर एगो अइसन समय आइल जब चारु ओर इलेक्ट्रॉनिक म्यूजिक के दौर छा गइल, पुरान, नया सब गाना रीमिक्स होखे लगली सन. ई डिस्को के जमाना के शुरुआत रहे. अब पिछला कुछ साल से रीमेक के दौर चालू हो गइल. सदाबहार गाना भा 80-90 के दशक के हिट गीतन में नया बोल जोड़ के, नया संगीत जोड़ के एगो अलगे गाना बनावल जात बा... आ ई हिन्दी सिनेमा के अब त हिट फार्मूला हो गइल बा दर्शकन के ध्यान खींचे खातिर. डिजिटल प्लेटफ़ॉर्म अइला के बाद सिंगल ट्रैक के दौर आइल बा ओहमें भी जम के पुरान गाना के रीमेक कइल जाता. बाकिर कई गो गीतन के रीमेक देखला के बाद ई बुझात नइखे कि एकरा के रीमेक कहल जाव कि नाश कइल कहल जाव.

हिन्दी के गीतन के रीमेक त रउआ रोजे सुने के मिल जात होई, ओइमें से कईगो त चार्टबस्टर साबित भइल बाड़े सन. अब भोजपुरी के कुछ अइसने गीतन के बारे में आज जानीं. एगो भोजपुरी फिल्म आइल रहे 1977 में दंगल. एह फिल्म में सुजीत कुमार आ प्रेमा नारायण पर फिल्मावल गाना काशी हिले पटना हिले सुपर डुपर हिट भइल. एह गाना के खूब रीमेक बनल माने खूब. जइसे मिथुन के 1996 में आइल हिन्दी फिल्म अंगारा के गाना ‘आरा हिले छपरा हिले’ एही से प्रेरित रहे. फेर एकरा बाद कल्पना अपना एल्बम में एही बोल से रीमिक्स अउरी रीमेक वर्जन लेके अइली. ई गाना नयका पीढ़ी खूब सुनल. 2019 के फिल्म जबरिया जोड़ी में ई गाना हिन्दी में फेर रीमेक होके आइल आ खूब सुनल गइल. एह गाना के खासियत इहे बा कि एकरा के सुनते सच में सबके कमर हिले लागेला. पिछला साल रितेश पांडे भी एह गाना के कुछ नया बोल जोड़ के ले अइलें आ ‘काशी हिले पटना हिले’ के नाम से इहो वर्जन खूब सुनल देखल गइल. कहे के माने बा लोग एह गाना के अपना हिसाब से एतना दोहन कइल कि एके असली रूप लोग भुलाइए गइल बा. एकर असली गीतकार राजपति के लोग त नकारिए दिहल. जे भी नया वर्जन में बोल लिखल अपना नाम के ठप्पा लगा दिहल आ उनुका के केहू क्रेडिट ना देला.

दंगल फिल्म के ही एगो गाना अउरी सुपरहिट भइल, मोरे होठवा से नथुनिया गुलेल करेला. एह गाना के फेर अक्षरा सिंह रीमेक कsके गवले बाड़ी आ खूब ठुमका लगवले बाड़ी. नयका पुरनका के आगे टिक त ना सकेला बाकिर पुरनका गाना के रिकार्ड कंपनी ही एकरो के बनवले बा त गीतकार कुलवन्त जानी के क्रेडिटो मिलल बा आ रीमेक वाला संगीत में जान भी बुझाता.
खेसारी लाल यादव के दू गो गाना रीमेक वर्जन वाला आइल बा. हालांकि उ अपने गावल कईगो एल्बम के हिट गाना के अपना फिल्मन में भी रीमेक कइले बाड़ें. खेसारी आजकल हिन्दी वाला तनिष्क बागची के रास्ता पर चलत दू गो हिन्दी गाना के भोजपुरिया रीमेक कइले बाड़ें. 1981 में आइल लावारिस फिल्म के गाना अपनी तो जैसे तैसे के भुला सकेला. अमिताभ बच्चन आ ज़ीनत अमान के अलग स्टाइल के डांस सभके इयाद बा. एकरा के किशोर कुमार गवले रहलें. फेर ई गाना हाउसफुल फिल्म में रीमेक भइल आ ओकरा के अबकी खेसारी लाल रीमेक कइले बाड़ें. अब ओ गाना से न्याय भइल बा कि ना ई त रउआ सभे सुन के पता लगाएम बाकिर हम कहब त लाग जाई धक्क से.

खेसारिये एगो अउरी गाना रीमेक कइले बाड़ें, अमिताभ आ रेखा के फिल्म मिस्टर नटवरलाल के ‘परदेसिया, ये सच है पिया’ गाना के. ई गाना भी एक बार हिन्दी में रिमिक्स हो चुकल बा जे में राखी सावंत के मनमोहक अवतार लोग देखले रहे. एह गाना के खेसारी एगो पंजाबी मॉडल श्वेता मेहरा के साथे पर्दा पर उतरले बाड़ें. आजकल जबसे कुछ हिन्दी के बड़ रिकॉर्ड लेबल भोजपुरी में आइल बा त वीडियो के गुणवत्ता बढ़ल बा, कलाकार महंगा अउरी चमकदार कपड़ो पहिने लागल बा बाकिर गीत के बोल के, ओकरा में छुपल विचार के अभियो स्तर सीडी कैसट वाला बा.

एगो तेजी से उभरत गायक नीलकमल भी एगो हिन्दी गाना के भोजपुरी में रीमेक कइले बाड़ें. ई गाना मिथुन के हिट फिल्म डिस्को डान्सर के लोकप्रिय गाना जिम्मी जिम्मी के रीमेक बा. भोजपुरी वर्जन में पुरनका के खाली हूक लाइन भोजपुरी में लिहल गइल बा. नीलकमल के साथे तृषा कर ‘मधु’ वीडियो में एक्टिंग कइले बाड़ी.



ई रीमेक के जवन बेमारी भोजपुरी में भी धइले बा, बुझाता लमहर जाई. देखीं, प्रयोग कइल कवनो बुरा ना ह. प्रयोग होत रहे के चाहीं. एह लिहाज से रीमेक से भी हमरा कवनो शिकायत नइखे. शिकायत सिर्फ एह बात से बा कि ढेर प्रयोग कइला के चक्कर में पुरनका गानवा के आत्मा के मत मार दीहल जाय. शिकायत एह बात से बा कि आपन नाम चमकावे के चक्कर में पुरनका के क्रेडिट मत खाइल जाय. बाकी त संगीत के धरती अभी बहुत परती बा, बोईं बिया, उपराजी करिश्माई गीत-संगीत जवना से मिले आनंद आ मिले सकून.

( लेखक मनोज भावुक भोजपुरी साहित्य और सिनेमा के जानकार हैं. )

अगली ख़बर

फोटो

टॉप स्टोरीज