छत्तीसगढ़ी म पढ़व- परबस होबे तहां तोर सबो सिरागे जानले

ते हाँ कमा धमा के लानत रेहे. सकलइया धरइया अपन काम मा लागे राहय.रोज सपनावय कतका होगे हो ही भगवान.कोन,कोन मेरन हावय अइसे कहिके नींद भर सुते नई पावय अलथी कलथी मारत कब पहाती सुकबा ऊ जावय पतेच नइ चलय ठंडाए जीव के बातअलग होथे ओला कांही कर डार फरक नई परय फेर ते हां आजले नई ठंडाए पाए.

संझउती के बेरा ला घलाव नई जाने –

आए हावस ते जाबे कहां.कहां के हे तोर पता ठिकाना.पता बताने वाला अन्तर्यामी तोला भरम मा राखे हे. चेतलगहा नइ होबे ते रददा चिन्हारी कइसे पाबे.घाम ला घरियाए धरे मा संझउती के कलर तोला मोहावय काबर नहीं.तोला पतियावय काबर नहीं तेला तींही जान.जूड़ छाँव के मजा ला सूरूज नारायन घलो पाथे फेर अपन ला ते जान तोला का पाना का खोना हे.

कभू नई जाने मिहनत के कमाई-

कमावत ले कमाते अऊ ससन भर खाते.ससन भर कमाई ला सबो पतियाथें तभे तो पछीना ओगारे मा पइसा के ठकसाल खनन खनखनाथे अइसे कइथें.चार पइसा सकेले धरे रा बखत परे मा काम आही.चल रे चेतलगा मन भिनसरहा ले चल.चलत ले संसार हे अऊ मिहनत मा सार हे.

कउवाए बइठे ठलहा बुता करइया-

ठलहा रहइया के का बुता.परबस मा तोर जिनगी चलत हे अऊ तोला चालत हे.पागेस ते मोहलो- मोहलो अऊ नई पाएस तहां पिचकाट.ऐती ओती करत रइथे त का पाते तेला ते नी जाने.अब तोरेच जांगर तोला घिरलावत हे।दत-दत करत रइथस.तभे तो शिच्छा के बात केहे सुने मा तोला जियानथे।जनावत ले जियानही तभे तोला पाछू दिन के सूरता आगी असन जनाही त चल परबस मा झन राहय कोनो तेला जानके आजेच ले चेतजा नईते .काली के काल ला घलाव तोला ढपेलही.

(मीर अली मीर छत्तीसगढ़ी के जानकार हैं, आलेख में लिखे विचार उनके निजी हैं.)

ब्रेकिंग न्यूज़ हिंदी में सबसे पहले पढ़ें News18 हिंदी | आज की ताजा खबर, लाइव न्यूज अपडेट, पढ़ें सबसे विश्वसनीय हिंदी न्यूज़ वेबसाइट News18 हिंदी |

Tags: Articles in Chhattisgarhi, Chhattisgarhi, Chhattisgarhi Articles